السبت، 31 مارس، 2012

الشجرة


شجرة "تين بنغالي" Ficus Benghalensis وبتتسمى كمان "شجرة طرزان" عشان الأفرع الكثيفة بتاعتها، اللي هي أصلا جذور هوائية بتنزل من الأفرع الكبيرة ولما بتوصل للأرض يتلتحم ببعض وبالجذع الأصلي. هي شجرة كثيفة ودائمة الخضرة على مدار السنة وموطنها الأصلي الهند.
الشجرة دي واحدة من الأشجار اللي زرعها الأمير عمر طوسون (1872-1944)، أمير الإسكندرية، المثقف المستنير، المؤرخ، عالم الجغرافيا، المستكشف، الأثري، السياسي الوطني، ورئيس الجمعية الزراعية الملكية اللي كانت مسئولة عن تطوير الزراعة  وتنمية الأنتاج الحيوانى في مصر... أيوه! كل ده!
عمر طوسون اتولد وتوفى في اسكندرية، و قصره كان في الحتة دي اللي اتاخدت فيها الصورة مطل على قناة المحمودية، اللي كانت شريان المياه العذبة اللي بيغذي اسكندرية وكانت منطقة سكن للأثرياء وقتها قبل ما تتحول وتبقى مستنقع ومصرف محاط بمصانع الصابون والعشوائيات. القصر كان إسمه القصر نمرة تلاته.
الشجرة النهاردة مابقتش جوه القصر، لإن النهاردة مابقاش في قصر.
القصر اختفى، لكن هي فضلت في مكانها.
الشجرة النهاردة بتستخدم كمخزن.
مخزن إطارات كاوتش مستعمل.
عمر طوسون

هناك تعليق واحد: