الأربعاء، 6 يونيو 2012

زيارة خاطفة لفيلا أجيون

منذ قليل قمت بزيارة خاطفة (قد تكون الأخيرة) لفيلا "أجيون".

المبنى لا يزال على حالته منذ محاولة هدمه في 2009. لا صحة لما تداولته بعض المواقع الإخبارية أنه قد هدم بالفعل. ما كان قد تهدم منه هو جزء من واجهته الرئيسية لا يزال - حتى هذه اللحظة - قابلا للترميم.
تبادلت الكلام مع صاحب أحد المحلات المواجهة للفيلا على شارع أحمد اسماعيل. بدأ الحديث بالطبع بعدوانية تعودت عليها في أي موقع أحاول تصويره. الكاميرا أصبحت مصدرا للرعب في شوارع الإسكنرية اليوم، ما إن ترفعها حتى تفاجأ بعشرات الوجوه العابسة والأيادي الممتدة والألسنة المسيئة. 
حاولت أن أطمئن الرجل أنني فقط مهتم بالمباني التاريخية، ففجأني بملامح يملؤها الإمتعاض:
- دي أصلا حتتهد الأسبوع الجاي!
- مين قال كده؟
- أنا باقولك! حتتهد الأسبوع الجاي!
- أيوه ازاي يعني، دي المفروض ممنوع تتهد.
- لأ خلاص! أصحابها ظبطوا في المحافظة وحيهدوها!
- !!!
- طب انت عارف مين اللي كان واقفلهم فيها؟؟ اسمه إيه ده بتاع "الإعلام" القديم.. حسني..
- فاروق حسني؟
- أيوه هو ده.
- دا كان وزير الثقافة.
- ماشي ماشي.. أهو فاروق حسني دا اللي كان موقفهالهم.. عارف ليه؟ قالهم النُص بالنُص وأنا أسيبكم تهدوها.. ولما مارضوش، وقفهالهم. 
- ........
- مش مصدق؟! وحياة ولادي دا اللي حصل!

قالها بعصبية، ثم تركني ليباشر عمله، وعينه لا تزال ترمق الكاميرا باستياء بالغ. التقطتُ صورة أخرى بزاوية مختلفة، ثم استدرت مبتعدا في صمت.
فيلا جوستاف أجيون، 6 يونيو 2012

هناك 7 تعليقات:

  1. الفيلا تحفة
    اسمه إيه الطراز المعماري اللي بيبرز الخرسانة في التصميم؟

    حرام اللي بيحصل ده فعلا
    البلد دي عايزة الحرق

    ردحذف
    الردود
    1. أوجوست بيريه كان مدرسة مستقلة في العمارة يا ميشيل. بس واضح انه هنا قاصد يستخدم عناصر من العمارة المصرية القديمة. وأكتر طراز اتأثر بالعمارة المصرية القديمة كان طراز "الأرت دِكو"، لكن دا مش مرتبط بالخرسانة الظاهرة.

      المقالة دي فيها أعمال تانية عظيمة ومدهشة لبيريه(الصديق إيهاب زاهر لسه باعتهالي):
      http://www.dieselpunks.org/profiles/blogs/concrete-and-classics-auguste

      حذف
  2. نفسي افهم برده هو ليه التصوير بيحرقهم اوي كده
    بينما هدم المباني اللي زي كده ولا بيفرق معاهم في حاجة (واحيانا كتير بيبسطهم كمان)
    بجد فعلا بلد عايزة الحرق ... بس حتتحرق ايه اكتر من كده مش عارف .. دي بقت رماد خلاص

    ردحذف
  3. بخصوص التصوير:
    http://mostanqa3at.blogspot.com/2010/05/7.html

    ردحذف
    الردود
    1. تحفة!
      أنا الموضوع وصل معايا للنحديف بالطوب! بجد والله كنت حاروح فيها وكانوا عايزين يكسروا الكاميرا. بس ربنا ستر :(

      حذف
    2. اكتب لنا طيب عن تجاربك في التصوير مع الناس

      حذف
  4. ياريت نلحق نعمل اى حاجة وعلى فكرة بكرة فى وقفة امام الفيلا لمحاولة الأنقاذ

    https://www.facebook.com/pages/%D8%AA%D8%B1%D8%A7%D8%AB-%D8%A7%D9%84%D8%A3%D8%B3%D9%83%D9%86%D8%AF%D8%B1%D9%8A%D8%A9-Heritage-of-Alexandria/250914451677409

    ردحذف